Journals
Thursday,Sep 29 2005, 11:25:00 PM今日既主題: 早餐
我+METAL+肥添+G奶+譚美= 新樂隊 "譚美哥斯"
之後係公司訓+食+執野+寫PSP故仔, 仲有幾條友發神經跟左小野落窮太郎食生蠔.
解脫.....是一種寬恕....
小肥豬地震ing+還看今朝
10/10 Gossip 17
10/21 青衣 IVE
10/29 LIVEHOUSE
新曲: GO! MC6!、打爆你、宇宙最強加油歌
--------------------------------------------------
今日係um board睇到肥3貼的一篇文章
講既係兩性既關係. 大意係叫女人控制自己的眼淚與脾氣.
女人的眼淚與脾氣在我生命中已經是很遠的回憶....
以前的女朋友都不沒有幾多需要發脾氣的機會, 甚至, 在我記憶中更有她們因為高興而流淚的畫面.
但是, 相反, 她們卻被現實所折磨, 因為距離, 將一滴滴可以發洩出來的眼淚, 變成長期的精神痛苦....
我的三段感情都是敗給距離, 即使科技有多進步, 要維持一段有距離的感情都是沒有可能的事.
無論投資再多的時間, 金錢, 都不能解決物理上分居兩地的問題. 再高的科技, 再多的投資, 只會將這個痛苦拉長.
這就是我給所有Long Distance情侶的教育: 就是大家還喜歡大家, 就是沒有人要怪責, 就是沒有大吵大鬧, 將快樂無限拉長變成痛苦, 最後無色無味地斷氣....阿門.
但係有得俾我再揀一次的話.......我都係咁揀......
Wednesday,Sep 28 2005, 06:32:08 PM今日既主題: 創作中
今日既主題: 創作中+十大經典奇案+楊成琳+國+亞樂+Berryz工房+Act of War+Dicky+Bass+某人
==============================================================
我今日需要既係靈感
Tuesday,Sep 27 2005, 09:30:22 PM今日既主題: 散
最近有點兒因為樂隊的事宜搞到無心工作, 有點玩物喪志, 就如小學生時給阿媽話 "心散" 但人長大了, 有誰工作是全心全意的呢...有誰不是散了半個心來工作呢? 有, 有三種人, 一種係找到理想的人, 一種係甘心做資本家奴隸的人, 一種就係鐘意玩精神自濁的perfect man.
http://music.llnr.biz/band.php?i=littlefatpig
終於在llnr reg左, 大家可以上去睇一睇啦.
10月小肥豬可能要出三次show, 真係破哂記錄。又作好左隻新歌, 即係話有三隻新歌係手等大家玩. 但係可能最新要求高左, 覺得有兩隻都唔多好聽咁既...正如我一向說, 做歌我喜歡快手簡單, 太玩時間撚的歌總不是我的style. 如果開心簡單好聽易明的歌是有市場的話, 我真的可以做一件作歌機器, 要求唔高既, 我一日可以作幾首添....
聽日要兩個會, 做野喇...今日打全咁多算喇.
今日的得著: 旦糕...與杯
Monday,Sep 26 2005, 03:57:30 PM今日既主題: 話不投機
今日睇左神話, 失望, 商業得來又扮史詩, 正經得來又扮搞笑, 成龍扮我祖先真係....哎, 唯有幾場刀劍打鬥幾有排場only. 真係...not my cup of tea. 講到隔世愛情大悲劇...呢套連《秦俑》都贏一條街.
而且強姦歷史不在話下! 蒙毅官至上卿, 並非如他大佬蒙恬一樣帶兵打仗, 反而應該是文官之流. 贏政末於沙丘, 當時蒙毅在會稽拜神, 並不是什麼接應徐福徐貴呢. 蒙毅是死於秘密處決的, 自然又不是戰死沙場....是蒙恬都仲似少少. 再說, 秦軍的軍服軍旗是黑色的, 並不是戲中有的紅色. 秦朝公元前23x年, 韓國連人蔘都冇條, 邊有咁高文明呢, 當時的韓國只係燕國的郊外, 仲未有整容技術. 就算日本當時都仲係部落呢社會咋....唔講喇, 總之就流啦.
今日新聞好睇, 泛民主派上大陸做show, 大陸又做show, 呢個真係星光爍爍show.
話香港人政治冷感, 其實係好事咖. 本來政府就最好越小越好, 越無為越好, 最好就無政府...娃卡卡~
泛民主派不得人心, 真係慘情. 其實人民理應個個都喜歡反抗強權 (起碼口號上) 但點解今時今日唔多有呢種feeling呢? 唔通香港人唔鐘意民主? 唔想人民當權? 原因好簡單, 香港已經有實際可享用民主喇, 即係香港面積細, 但實用面積高. 唔似西方國家面積大, 實用面積細或者地方唔見駛+唔方便打理. 民主衛道者一見我咁講一定媽媽聲, 好sorry, 我收番, 香港冇民主, 香港人民依然追求民主...咁我唯有改一改解釋, 就係因為民主派唔能夠代表民主囉~~不過點都好, 我都好多謝好需要民主派去製造反對聲音, 真係好感激, 雖然普選就得個講字, 但起碼都仲有野可以講, 可以期待丫.
明天會更好, 但距離幸福還很遠, 這個世界實在有太多苦難. 唔承認苦難, 設定不設實際的憧憬都是不負責任, 無助現實而又是最偽善的扮好人方法. 呢類仆街仲仆街過班仆街
Sunday,Sep 25 2005, 07:04:06 PM今日既主題係....昏迷
係夢入面, 我見到露雲娜, 曾路德, 同雷安娜......
好喇, 因為出完SHOW+去捧RUSTY CROSS...全身都勁支力.....
痛....
-----------------------------------------------------------------------------------
某某的妹妹好像傳來麻煩事.
好多人話年少輕狂, 反叛.
其實, 老左之後唔係一樣輕狂, 反叛咩?
之不過, 人大左, 知道輕狂, 反叛最後受害既都係我自己, 所以先唔會立亂反面,
開始學識死忍, 奸笑, 忍一時風平浪靜, 退一步海闊天空.
但咁並唔代表內心唔輕狂, 唔反叛.
但少年人有時的反叛所帶來的破壞是終生的, 有時未來得及長大....
所以我是不育主義者, 如果生仔, 唔識教仔 (教女更難....)
天下間好多父母都係同我一樣, 唔識教仔, 不過有理冇理生左出來先算.
其實, 唔知work唔work, 教仔教女我認為有一個方法, 就係數還數, 路還路.
你可以話俾佢聽你有幾愛佢, 但唔等於你可以控制佢.
你可以因為佢既錯而痛罵佢, 但係鬧完要sharp cut, 俾佢知道對事不對人, 一旦動氣, 連我都不會再聽入耳, 唔反叛才怪.
你要將現實話俾佢聽, 要佢細細個就開始接觸錢. 每一樣野你都要俾知道價錢, 俾佢自己買. 你可以定額幫助佢, 但要佢自己理財.
你要自小就俾佢自己將來的出路, 唔好一句:唔讀書第時就冇錢, 就咁只係一句口號而已, 小朋友唔明的. 你打開一份求職報紙俾佢親眼睇, 咩工要咩學歷幾錢人工. 同佢分析屋企的經濟情況, 老豆搵幾錢而D錢係點用....
帶佢去參觀下警局, 法庭同監獄, 俾佢睇下如果犯法會點, 有咩下場. 咩罪會判幾多年, 留咩案底, 律師費又收幾多....
一個面對現實的小朋友, 係, 有點殘酷, 但咁既小朋友, 一係好乖, 一係就聽明到絕頂.
如果自己經濟情況唔足夠為小朋友提供以上的教育, 咁就唔好生佢出來. 除非你承認你生個仔是一項投機, 連投資都唔算.
而且就算係投資都唔岩, 資本主義下冇可能人人都醫生律師大商家, 如果你的孩子可以自力更生, 你應該已經很滿足. 如果孩子不算飛黃騰達, 你都不可以怪他, 要怪就怪你自己.
所以, 各位未來父母, 我就唔會生仔喇....