Journals
Thursday,Oct 26 2006, 04:30:11 PM跑跑跑, 還是沒有用~~
umn.... 公司好友下星期就last day喇.... 當佢走左之後, 普遍都好難keep, 佢仲要去到對面海返工, 好遠呢... 下個月中又有另一位好友會走, 咁短時間內公司內少左兩位好友... 將會變得比較冷清呢. 真係好唔開心. 雖然平時返工唔係為左玩或者吹水, 之但係如果少左d好友, 日日返工, 時間流流長真係好難過, 我唔想返工o既日子咁悶....
雖然o係公司, 我經常被傳我同佢有野, 但係我一向少理, 由得人地點講, 我每當做左一排野, 又得閒o既時候, 我都會走過去吹吹水. 人地成日都話我 "又乘機", 哈哈.. 咁我就會話 "擺到名係喇!!!". 前前後後都被人傳左成年喇... 慢慢時間耐左, 其他人已經唔再傳, 直頭當左係真tim... 真係頂佢地唔順. 不過公司要有呢d傳言先有樂趣o既, 會多d歡樂o既氣氛嘛, 況且我又唔介意, 如果傳傳下真係變成真事都幾好架, 話晒人地都係一個好女仔, 哈哈~~
當我得知, 佢下星期last day, 我當時真係唔識比反應, 只係呆左, 又少少唔相信, 但仍要接受. 好老實同老土d講句, 真係好唔捨得呢..... 所以呢幾日都冇乜心機做野, 每晚返到屋企食完飯, 睇緊電視果陣都投入唔倒, 所以索性走去跑步, 諗住做完運動, 個人會輕鬆d, 唔會對呢件事咁介懷. 點知一連三日, 晚晚去到運動場跑呀, 跑呀.. 跑呀... 都係冇用, 每次都係換來心諗一句 "唉, 佢要走喇.... 再冇得食佢親手整o既蛋糕, 同埋批".
到左而家呢個地步, 唯用襯佢仲o係公司, 就多d同佢玩, 同埋傾多d計喇...
Tuesday,Oct 24 2006, 04:41:17 PM另謀高就
今日收倒個消息, 公司內一個好友將會辭職lu, 唉, 真係有少少唔明點解, 我o係呢間公司做左年幾, 每個月都要 farewell, 真係未停過.... 有幾個月仲要係farewell多過一個人tim... 來緊仲要係farewell D 比較friend果d tim...
我地公司平時玩開果班越來越少人, 續個續個都轉工, 而家d活動已經比以前少左好多喇, 當d人轉左去第二間公司, 都比較難約番出來玩. 雖然人人都一定會各散東西, 包括我自己在內. 我自己都諗緊幾時開始我o既轉工計劃. 一諗倒轉工都幾麻煩, 要搵工, 又要見工. 而家呢間公司唔係唔好, 只係有少少唔憤氣. 本身諗諗呢個十月有得升職, 點知突然間換左老闆.. 真係頂頂頂~~~ 個新老闆仲要偏心, 升埋d好多人都覺得唔值得升o既人. 諗起都嬲.... 不過冇計喇, 被升職o既呢個人把口查晒油.
我諗我都差唔多係時候去JobsDB 漁翁喇.......
Sunday,Oct 22 2006, 12:37:50 PM輕鬆愉快的週末
今個星期六日, 都可算係過得既充實, 又輕鬆愉快喇. 尋日一朝就同公司朋友仔女入左大尾篤踩單車. 我地首先踩去水霸享受陣陣涼風, 再欣賞水霸上o既風景, 拍下照, 如果開埋餐就真係正喇~~
之後我地就向沙田出發, 當時已經接近十二點, 我地想兩點倒去到沙田食下午茶, 我地沿途經過大埔海濱公園, 吐路港公路, 由於我地時間緊迫, 所以都冇時間拍下照, 下次一定要再去果度影下相先, 因為果度d風景真係好靚, 唔去果度踩單車, 去果度漫步都已經好舒服. 有一件事好不肯o既就係我地其中一位成員在城門河果頭炒車, 搞到佢食完個下午茶之後就被迫退出回家. 有樣野好得意, 平時並唔起眼o既食物, 當個人累及肚餓o既時候都可以變成美食, 當我尋日飲第一啖公仔麵o既湯, 都覺得非常之甜, 好好飲, 再食一口麵, wow, 果一下o既爽簡直難以形容. 最後飲埋杯冰凍o既朱古力奶, 真係超正.
之後又繼續我地o既行程, 原本我地冇打算去大圍, 但係因為我地要還左果一架退出o既車, 而果架車只有大圍先可以還, 咁就大家一齊去大圍一轉喇~~~ 還完車我地時間剩餘冇多... 距離六點只有一個半小時. 對我來講, 由大圍回大尾篤, 基本上係冇可能, 但都盡力吧!!!! 最後經過連番抽筋加一兩次輕微炒車, 終於在六點五十五分到達, 我地原先o既目標係想七點前返到去, 最後大家都做得到, 真開心, 哈哈~~~ 我第一次來回大圍同大尾篤, 真係一大突破.. 哈哈~~ 但係換來o既代價就係個pat好痛... 架 "dump 頭" 車個坐位硬到飛起, 每震一下都痛到入心入肺, 今日o係屋企坐低冇事, 起身果下就真係.... oh, my god!!!
今日星期日, 原本打算o係屋企休息抖一抖, 但係又醒起要出去剪頭髮 (今次換左個新髮形, 哈哈~~~), 咁就順便出葵芳行下喇... 今日o係葵芳shopping好開心, 好多收獲, 包括一盒DVD 日劇, 同埋一套 "兄弟" o既文學書. 睇到呢度o既你係咪 "O" 左咀呢?? 心諗 "咁都叫好收獲", 哈哈~~ 其實今日自己一個人都幾嘆, 首先就o係Delifrance 叫左杯 Iced Mohca, 坐o係度一路聽住 Kenny G - Grestest Hits (超正), 一路睇書, 足足坐左成個鐘先走, 因為我有少少唔好意思, 只叫一杯野又坐左咁耐.. 哈哈~~ 之後就準備回家食飯lu, 唔知係咪之前睇書睇得耐, 個人太累, o係巴士度訓著左, 巴士到左總站都唔知醒, 最後好彩有位女乘客叫醒我, 如果唔係我又可能出多葵芳一轉...
總括來講, 呢一個星期六日真係好正, 好充實, 希望打後o既假期都可以咁.
Monday,Oct 16 2006, 05:53:52 PM2006 國慶
Saturday,Oct 14 2006, 07:16:05 PMOceanPark Halloween Bash
我今日同朋友去左海洋公園Halloween Bash, 勁好玩呀, 好正, 今次d鬼屋質素好好, 仲要比上年多左好多show, 好好睇, 氣氛好好多. 真係正. 勁開心, 因為今次可以玩得晒所有鬼屋, 同埋睇晒d show. 時間剛剛好. 不過如果再多一兩個鐘比我, 等我可以慢慢同d扮鬼扮馬既工作人員影相就好喇....
總括來講, 今年真係好好玩同抵玩.. 排隊又唔駛排得太長, 冇咁掃慶, 哈哈~~