Journals
Monday,Nov 27 2006, 04:08:21 PM忙碌的一星期期
自上星期到今日, 中間都有d野想打返上o黎記低佢, 但係我個人呢排比較懶, 少上o黎呢度打野, 搞到好似荒廢左咁. 唔得, 我要努力, 盡量記番底多d野先...
首先係上個再上個星期五喇.. 17/11. 呢日係我公司雙子座好友 Diana last day. 一諗番o係, 又有少少唔捨得佢. 因為佢唔單只轉工咁簡單, 佢要返去加拿大喇, 以後都唔知有冇機會見番lu. 佢逗留o係香港o既時候仲有兩三個月. 唯有珍惜餘下o既時間相聚多d喇~~~ 如果有機會, 真係想成班人一齊過去加拿大住佢間大屋一齊玩, 一定好正... 但係點都係得個想字, 哈哈~~
跟住之後o既星期六日, 就同佢地呢班老友記上左遊輪玩, 都好好玩呀, 上到去影下相, 食下buffet, 夜晚o係間房度癲下, 同佢地呢班人去玩, 真係可以乜都玩, 玩得好癲, 大家已經太熟喇, 唔會有野係大所為. 識左十幾年, 乜野醜相都見過喇.. 所以對住佢地, 玩咩都唔怕, 一於逢陪到底, 哈哈~~
之後唔知係咪玩得太勁, 搞到病左, 就係因為病左, 我有一日請左sick leave去左睇醫生, 就係因為咁我就好似突然間破費喇, 因為我走左去配眼鏡, 其實都幾搞笑, 係我行行下被一個人叫左我入去間舖頭度配眼鏡, 我本身冇諗過配, 但係聽聽下其實自己想配. 因為舊呢幅整到個鼻好痛. 最後我揀左一幅我自己都幾滿意o既眼鏡, 佢仲會送埋一幅寶禮來偏光o既太陽眼鏡, 幾好.. 正. 咁我就唔需要去另外配有度數o既太陽眼鏡喇... 結果, 我當日又破左少少費.. 哈哈~~
到左最近呢個星期五, 係公司一年一度o既staff meeting. 今年公司唔知點解咁毫, 包左海洋公園夜場比我地玩. 當日四點鐘就放工喇, 去到海洋公園o既海洋劇場聽左一陣野, 再睇埋海豚表演就自由活動喇. 我呢個攝影師當然唔會錯失機會, 不停咁幫我d同事朋友影相, 都影得唔錯. 又有去玩d "最刺激" o既機動遊戲. 但係自從果次去長隆之後, 香港海洋公園o既機動遊戲真係麻目晒... 冇乜特別感覺. 就連跳樓機都玩左幾次.. 都冇乜野. 最後我地仲去埋石磨坊食埋甜品就散水喇... 第一次去食石磨坊, 唔錯, 幾好食... 同滿記係兩種唔同類o既甜品. 好好味.
Sunday,Nov 19 2006, 11:34:48 AM與病抗戰一星期
今個禮拜都唔知做乜... 自從上星期日踩完單車 + bbq 之後就好似賴左野咁, 之後頭幾日首先就喉嚨勁痛, 去左睇醫生, 食完藥醫好喉嚨痛就到傷風流鼻水, 真係比佢玩死, 個鼻係咁塞, 係咁塞... 唔單只咁, 當傷風未完全清晒o既時候, 又有另一種病出埋o黎, 就係好難頂o既 "喉嚨癢不停咳".... 真係要頂... 咩事呀... 三樣野排住隊咁o黎, 想我死咩... 搞到我呢個禮拜都冇一日舒服過...
唉, 希望個病魔快d離開我喇... 日日咁病法, 真係做野都做得唔順暢, 玩又玩得唔舒服....
Monday,Nov 13 2006, 03:33:06 PM秋季大旅行 2006
尋日星期日係我地一年一度o既秋季大旅行, 實不相瞞, 其實我係第一次參加秋季大旅行. 往年我都冇出席過... 今年旅行分左兩part. 第一part係踩單車 (由大圍去大尾篤), 第二part係o係燒烤大王度燒烤.
踩單車好好玩, 我已經好多年冇同佢地踩單車喇, 數落都起碼5-6年... 踩單車成員有我, Bobby, 基仔, Joe, 雞, Jack, LWS. 今次d單車好新, 之係個坐住衰左d, 冇被震, 搞到個屁好痛. 我地大家準備好就出發喇, 當日天氣非常之好, 好好太陽, 我覺得好適合踩單車. 我地今日全程都好輕鬆, 好舒服, 好安全. 最少人人都冇損手爛腳, 非常之好. 只係中間有少少插曲. 就係lws對金銀衣紙牌o既戰鞋, 呢對鞋好巴閉. 可以令到lws唔駛用break都可以停車, 超勁. 仲要係用鞋頭一野插落地下度整停架車. 成支金鋤頭咁. 當然, 最後佢要付出代價喇, 就係成對鞋報銷. o係大埔買番對白飯魚頂上, 哈哈~~
除左爛鞋事件之外, 仲有另一樣野, 就係lws踩單車腳頻好快, 但係架車唔係點去, 哈哈.. 勁搞笑... 我見佢踩得好落力.. 之後我地食左個下午茶, 又再向大尾篤出發喇, 最後上埋水霸, 影左幾張相. 不過當時Bobby明明話, 等我地出到去, 再搵佢地幫我地影單車團體相, 最後唔知點解又冇左件事. 最終我地用左大概六個鐘頭完成左我地o既單車之旅.
之後下半場, 我地就去左附近o既燒烤大王燒烤, 我地叫左兩個燒烤套餐, 每人hk$80蚊, 唔算貴, 仲食剩好多野, 我諗下次可以叫少好多. 燒烤陣容就好大, 有成17個人. 今次燒烤d野食質素幾好, 唔錯, 味道都夠. 唯一有少少唔好, 就係某幾個位要不斷吸煙, 死忍爛忍, 最後都會被煙供到標眼水, 同埋塊面好熱, 最後好多人都頂唔順, 不斷咁轉partner (即係換位o既意思... XDD). 直到大概十一點倒, 我地就開始執野離開現場, 答車, 然後散水喇~~~
總括來講, 今年o既秋季大旅行好好玩, 特別係第一part, 今年miss左o既朋友, 下次一定要參加喇~~~~
Sunday,Nov 12 2006, 04:39:01 PM舊中環天星碼頭 last day
天星碼頭, 我印象中原來我踏足過兩次 (以前細個果d可能唔記得喇, 都唔知有冇). 一次係由尖沙咀答船去中環, 而另一次就星期六果晚由中環答船去尖沙咀. 老實講, 我對天星碼頭o既歷史並唔深刻. 但係我相信呢個碼頭係見證香港維多利亞港o既發展同埋變化. 呢個碼頭o既鐘樓亦不停為碼頭發出 "叮噹叮噹" o既聲音幾十年去報告時間. 當過左星期六 (2006年11月11號) 之後, 呢個碼頭就會關閉, 而個鐘樓亦會被停工.
再見喇, 舊中環天星碼頭 !!!
Monday,Nov 6 2006, 04:02:17 PM后海灣百萬行 + 黃金海岸
上星期日, 我同公司朋友一行人去左行后海灣幹線百萬行, 團友包括我, alan, boey, davy, florence, karmin, samson, setto, setto's mother & father and vg. 非常之熱鬧. 今次係我第二次行百萬行. 上一次係去行青嶼幹線. 都已經係好多年前喇. 今次晨早就已經入到去屯門呢圍度集合. 等齊人之後就開始行喇. 我好期待今次o既百萬行, 因為前一日我同samson一齊買左支新鏡頭, 係一次wide 鏡. 今次可以襯百萬行o既靚景來試鏡, 真好.
行到半路, 見倒對情侶好搞笑. 佢叫我幫佢地影相, 好奇怪地佢地同我講, "我地好鍾意影相架, 我地第一次影相, 唔該你幫我地影張相". 佢地果陣企左o係塊快相攝影機o既路牌隔離. 我幫佢地影完之後, 我就話 "你地已經超速喇", 之後我行左o係佢地前面, 咁佢地就話 "你話我地超速, 你又行o係我前面".... 哈哈.. 真係估唔倒, 同佢地可以有呢d對話... 真搞笑. :-) 最正o既就係, 之後行行下又見倒佢地, 佢地今次企o係80公里o既路牌下面, 咁我好自然又幫佢地影相, 哈哈~~
大概三小時時間, 我地就行完全程喇, 之後去左屯門市中心美心茶樓飲茶. 飲完之後, 我, samson同karmin就決定再入黃金海岸影相, 還掂時間尚早. 我係第一次去黃金海岸. 果度d 樓好靚, 環境好舒服. 住果度就好喇, 不過出入冇咁方便. o係果度d 黃昏feel好正. 影相一流, o係果度漢茶傾計更加一流. Karmin因為有約, 所以要先走, 之後我同samson兩個人就步行去沙灘影隻咸蛋黃. 去到果度又有一對情侶叫我幫佢地影相.. 哈哈, (點解今日咁多情侶叫我幫佢地影相...). 大概六點倒, 我地就回程散水喇.
總括今日好開心, 有得行百萬行做善事之餘, 又有得影相... 好正~~ 下一站, 我想去赤柱, 唔知幾時可以搵o岩人一齊去呢~~~~