Thursday,Dec 21 2006, 04:33:05 PM爆笑 talk show (勁搞笑 & 超低能)

12月20號, 我同Cman去左睇林海峰 talk show. 林海峰上年已經開過第一場, 但係我果陣仲未識得欣賞呢個人, 所以冇去到睇. 今年開第二場, 就試下去睇下. 呢個talk show好多人睇, 最初開始公開發售果陣係冇飛的, 好彩佢有加開場, 之後我地就揀左呢場尾場, 好好~~~ 果陣初頭買唔倒飛, 真係有少少失望, 難得有興趣去睇, 竟然買唔倒~~ 不過點都好, 最後都買倒好正位置o既飛.

我地好早就已經到左, 其實都唔早, 因為佢遲左開, 感覺上我地坐o係果度等左好耐, 哈哈. 一開場果陣, 見倒林海峰出場, 我諗好多人都收倒風, 佢會派禮物, 所以d人已經衝晒出去, 當然我都唔會執輸喇, 哈哈, 可惜最後我係空手而回的, 幾樣衰呀!!!! 講到樣衰, 仲有樣野仲樣衰.. 哈哈, 就係開場前坐錯位... 真係 oh my god!! haha. 仲要連續坐錯兩次, 被兩對人問 "先生, 想對一對張飛"... 真係瘀到爆, 哈哈

整場talk show, 都好好笑, 雖然有d內容係好低b, 但都好好笑, 抱住輕鬆o既心情去聽就好好. 我好鍾意佢扮人聲, 唱浮誇, 尾果part "勁搞笑, 超低能", 同埋最後首勁歌今曲, 好勁呀.. 好好聽, 好好笑. 佢出左碟, 我一定會買返o黎再睇過.. 睇完呢場之後, 我仲即刻問Cman借埋第一場比我睇, 哈哈...

果日睇talk show好多收獲.... YEAH~!~~~!

Thursday,Dec 21 2006, 04:31:41 PM遙遠的她

走了一個好朋友.. Diana終於o係上星日 17/12 答飛機走左喇. 果日我地成班HKBN朋友去左送機, 場面好虛憾, 有成差唔多廿個人去送機, 可想而知我地成班人都唔捨得佢走.

首先show張大合照先~~~ 左邊第三個就係Diana喇.

我地送走Diana之前幾日, 仲達成左佢o係香港最後一個願望, 就係去遊電車河. 我地o係13/12 租左一架電車去遊電車河. 總共有成二十幾人, 勁呀, 都未試過咁多人一齊o係d 公共交通工具上面玩. 當日架電車都算幾靚架, 等我比大家睇睇先..

我地當日主要都係o係上層度玩, 因為可以望多d風景, 同埋影相都影得開心d. 不過企o係車上層好食風, 食左成晚, 飽晒lu~~

跟住Diana o係電車旅程完畢後, 擺了一個Yoga 姿勢, 哈哈, 勁呀~~~

就係咁, 以上就係Diana 走之前, 同我地最後一次團體活動, 希望佢下年聖誕可以返倒香港喇, 到時再一齊出去玩~~~~

Sunday,Dec 10 2006, 11:46:10 AM馬拉松初體驗

今日好開心, 因為成功跑完15km o既馬拉松, 時間係1小時25分鐘. 今次係我第一次參加馬拉松. 我自最初都打定輸數, 一定跑唔足全程, 因為我自己平時練跑都只係跑倒10km倒. 今次經過有好多人陪跑o既情況下, 自己都可以完成倒15km, 真開心, 呵呵呵~~不過今朝都好辛苦, 因為要好早起身, 朝早5點鐘就起身, 5點半出門口.

我都好耐冇試過天未光就出門口, 以往只有天未光 (差唔多光) 就返到屋企, 哈哈. 因為今次個馬拉松係去欣澳地鐵站起跑, 所以我要一早就去答地鐵, 當去到荔景地鐵站, 見倒好多人, 個個都著住跑步o既裝束, 感覺好正~~~ 一到左欣澳站, 等埋我阿哥就去報到喇.我今朝第一次用流動廁所, 哈哈.. 係咪好神奇呢?? 其實我覺得流動廁所好污遭, 咁多人去, 又冇d 力大o既水去沖廁... oh no... 臭臭!!!!~~~ 去完廁所就做熱身運動, 然後準備起跑喇... 起跑前, 見倒梁詠琪做演講嘉賓, 佢真係好高, 本身都已經高, 仲要企o係個台上面..

起跑之後就冇再理佢喇, 之但係太多人o既關係, 開頭一段頭都要慢慢跑.. 之後跑呀, 跑呀.. 不停咁諗, 唔可以停, 唔可以行.. 要盡量完成佢, 之不過中間因為腰間有少少痛而行左一兩分鐘 (真可惜~~). 好彩之後都冇再行過, 繼續咁跑去跑畢全程lu.跑完之後, 對腳好累, 從未試過咁累, 但係衝線果下感覺好爽, 好正, 好有成功感, 好興奮, 真係想跳起身大叫 "Yeah"... 可惜當時對腳冇力... 哈哈... 仲有我懷疑有時落斜果陣震親隻腳, 而家左腳膝頭每行一部路都痛.. 真慘.. 來緊呢個星期都唔好做運動住lu.. 比對腳休息下先~~~ 之後做埋登記, 拎埋張cert (有張cert架, 證明跑畢全程, 好野). 就走lu, 答地鐵去東涌飲茶... 爽呀~~~

下一次馬拉松係下年3月4號渣打果個, 果個只有10km, 都應該冇問題, 不過最重要o既就係要減磅, 我唔想再震傷對腳, 同埋可以跑得輕鬆d, 呵呵~~~~~

等我show下我塊號碼布先 ~~~~

Tuesday,Dec 5 2006, 03:09:04 PM飲飲食食購物日

星期一, 係最後一日假期, 當然想出下街輕鬆下喇, 所以我就約左阿Pui同LWS出左旺角行街, 飲下午茶, 同埋shopping. 本身諗住朝早, 早少少起身自己一個人去左紅磡去買Holga 相機. 但係點知訓過龍, 遲左起身, 最後都去唔成. 之後就索性o係屋企等呀等.. 等到夠時間先出門口, 因為約左佢地三點鐘o係旺角.

一出到去, 等左一陣, 見冇乜野做, 就走左去報紙檔買左本新假期. 嘩, 而家d書真係好抵睇, 呢本野只需HK$10, 但係佢有成6本書囉... 分別講下聖誕節搞party呀, 飲飲食食, 去韓國, 泰國等等o既介紹. 如果睇晒咁多本野, 真係可以消磨一段時間. 我等左一陣就會合左LWS同埋阿pui喇, 之後就去左上樓飲下午茶, 我好鍾意去呢度飲下午茶, 呢度d人蔘烏龍茶好正, 我好鍾意. 尋日都唔記得問佢地覺得d茶點tim.. 哈哈

之後我地就開始去shopping喇, 我今日個目標係買一對鞋同埋一個袋~~ 行左好幾間運動舖頭, 最後都揀倒鞋同袋喇, 我仲同阿pui, lws買埋情侶袋tim, 真搞笑, 有機會一齊帶出o黎比大家睇下. 我地今日三個人都有收獲, 真開心. 仲有, 我地仲試食埋好好味o既曲奇餅. 等我下次經過再買o黎食先~~ 我幾鍾意食雞仔餅, 同埋有果漿果隻, 當然朱古力曲奇亦係我o既至愛喇, 哈哈~~

Tuesday,Dec 5 2006, 02:49:49 PM家庭影院計劃

上星期六, 我朝早飲完茶之後, 就同我阿哥出左去銅鑼灣, 打算去拎今個星期日 (10/12) 聯合國兒童基金慈善跑o既資料, 包括T-shirt, 號碼布等等. 一到達Time square門外, 就見倒Sony 擺 Playstation 3出o黎做展覽, 我亦行埋去試玩左一陣. 發覺d遊戲好正, 畫面勁靚, 音效又正. 真係想搬部電視機同埋部遊戲機返屋企玩, 哈哈~~ 經試玩完, 同埋問左幾條問題, 就知道左, 原來今次呢一代, 係可以免費上網同人地一齊玩的, 即時覺得非常之好, 因為玩遊戲一個人玩係會好快悶, 多人玩先有樂趣. 於是我就決定左, 會買呢部PS3 返屋企, 可惜香港暫時缺貨, 仲未有貨, 要等. 不過都唔駛急, 我屋企d電視, 音響仲未ready.

之後就索性行埋豐澤去睇下d 電視同埋音響, 我睇左冇幾耐, 就睇中左一部37吋samsung o既LCD TV. 外型靚仔, 解像度夠高, 相比起又唔算太貴. 另外, 如果想令到部PS3 出倒 5.1 / 7.1 聲道, 就要買埋部 AV Receiver先得. 我亦睇中左部Onkyo 入門級的. 行左成晝, 都只係睇, 唔會買住, 因為我仲要過左我屋企果關先, 問一問佢地o既意見, 唔知佢地會唔會唔鍾意我去買呢d野, 哈哈, 所以暫時忍一忍先, 更何況部PS3 都未有貨~~~ 同埋我又要睇下配邊d speakers先好, 真係幾複雜, 要睇好多野~~

之後夜晚入青衣參加朋友o既畢業禮, 同埋幫佢影相, 之後夜晚食埋飯就返屋企lu, 因為第二朝要早起上大陸, 所以都好早去訓覺喇.~~~