Tuesday,Jan 23 2007, 04:21:42 PM朋友, 佢在乎你嗎???

究竟別人要做乜野先會令你感受到別人是在乎你的??? 打個電話? send個短訊? 乜都就晒你, 聽你話? 或者會唔會人地只需對住你講一句簡單o既說話就可以呢?

我相信每個人對取得 "在乎" 個要求都唔同, 又對從唔同人個要求亦唔同~~~ 但當諗到自己, 究竟自己需要乜野, 先會感受到別人是在乎自己的,

 

Thursday,Jan 4 2007, 03:14:00 PM2006年 肥Bear傳

講到2006年, 最值得提o既就係我重遇番我d兄弟姊妹. 一班認識左十幾年o既兄弟姊妹. 我曾經同佢地斷絕好多o既聯絡. 好多時我都推晒佢地o既活動. 以往幾年, 基本上一年只會見面幾次. 唔知會唔會多過五次呢. 當我今年再搵番佢地o既時候, 佢地冇拒絕我, 仲仍然歡迎我. 諗番轉頭, 當年我次次都推晒佢地, 真係好慚愧. 所以真係好開心好開心. 佢地冇放棄我, 真係多謝你地!!!! (每次諗起都好感動呢...~~~ 真係要好好珍惜佢地)

就係因為我今年再會佢地, 所以今年年尾大部份假期都係同佢地過, 包括聖誕, 同元旦假期. 基本上, 我呢個長假期 (總共10日) 好開心, 可以陪晒我d家人, 親戚同埋朋友. 因為佢地, 令我過左個既歡樂又充實o既假期. 

 
購物 & 爸爸生日晚宴

12月23號, 比較得閒, 出左旺角行街. 順便買聖誕禮物. 再等Cman之前, 我就去左Pacific coffee坐左個幾鐘睇書, 真係幾舒服. 只需買一杯咖啡就可以了~~ 之後行晒旺角比較熱鬧o既商場, 都搵唔倒合適o既禮物, 最終空手而回. 之後去埋朗豪坊行下. 就見倒果度個天空之城. 果度個聖誕裝飾真係好靚. 細細地個城堡, 配合埋銀色o既波波. 顯得好華麗.

因為我夜晚要同爸爸食飯慶祝生日, 所以就出左荃灣. 去左金龍船食. 我覺得呢間茶樓真係麻麻地. d餸冇乜特別, 又唔係特別香. 又有d唔夠熱. 下次真係盡量唔好揀呢間. 食完飯之後, 我又要去揀禮物, 因為之後冇時間揀了. 我最後o係荃豐中心搵倒喇. 件禮物都幾合心水. 跟住夜晚就可以專心準備明天o既露營喇~~

 
西貢露營 (鼻鼾中心) 

12月24號, 我, Bobby, 雞, Jack, 周周 同埋 Bobby's 表姐, 表姐夫, 仲有兩個朋友 去左西貢露營. 今年平安夜好特別, 竟然係o係山頭渡過. 仲要係寒風陣陣. 我地一行人上到山頭o既時候, 休息左一陣就開始整個營. 我已經好耐冇露營喇, 所以好多步驟都唔記得lu. 所以我都係跟住佢地去做. 現我亦不時幫佢地拍下照, 影低當時大家努力o既情況. 當大家整好晒個營之後, 後來突然間有一群牛走到o黎附近食草. 好多隻, 同埋有d仲好大隻tim. 阿雞因為多次阻住牛食草而被佢地撞. 真係好好笑. 到左夜晚, 我地就係打邊爐. 打邊爐應該係山上最方便又暖o既. 開個火, 放d野落去就搞掂晒. 食完之後, 我地就去左傾下計, 睇星星, 同埋影下相. 最後夜晚我地仲飲埋紅酒, 食芝士. 今次所飲o既紅酒好好飲, 好容易入口, 比起我地之前自己買果d相差好遠. 再配埋一粒粒芝士, 就真係幾正~~~

當晚訓覺, 我同雞, 周周同一個營. 我身處就好似一個鼻鼾中心, 左右環迴立體聲. 再加上當晚天氣好凍, 好大風. 吹到個營 "發發聲". 搞到好難入睡, 好彩最後都訓倒. 到第二朝, 食埋早餐 (有d係尋晚食淨o既野), 執埋d野, 我地幾個因為要去聖誕party, 所以要走先. 總括來講, 今次露營好好, 好舒服, 唔辛苦. 玩o既成份好少, 主要係想去親親大自然. 最特別係, 第一次平安夜o係山頭上渡過, 有一份另類舒服o既感覺, 哈哈~~

 
聖誕Party - 紅

12月25日晚, 我地成班人會去阿佩屋企出席聖誕party. 當晚, 我約左Cman, LWS, 雞 and 周周一齊入去. Bobby好犀利, o係我出席之前, 已經將阿佩屋企報置晒d燈式, 好靚. 因為當晚個主題係紅, 所以人人都必需要穿著有紅色外露o既衣物. 當晚, 我相信人人都好開心, 一來可以成大班人一齊開party, 又可以同遠方o既黃丹透過msn o既video conference 去傾計. 又有得交換禮物. 真係非常之好. 當晚好多食物, 所以最後都食唔晒, 有少少浪費. 下次真係唔好預太多食物了~~ 我當晚所抽倒o既禮物係零食物語現金卷, 而我準備果份蘋果立體puzzle就由阿Yuen所得. 唔知佢玩完未呢? 定係玩極都玩唔掂呢?? 最後個party去到兩點鐘倒散場lu. 而我亦冇通宵.

umn, 呢個party好開心. 因為我第一次參加佢地所搞o既聖誕party. 好熱鬧. 我年年都要參加~!!!!!

 
南丫島之探險

12月27日, 去南丫島, 我第一次去, 其實呢個島, 除左有個風力發電廠, 同埋只有一種用來運貨o既小型汽車, 其實都冇乜特別. 果日由中環答船入去, 我諗太概半個鐘倒, 就倒左榕樹灣. 果日天氣都算好好, 所以d 風景都好靚. 開頭盲摸摸, 睇住d 路牌, 最後都上到去風力發電廠. 果度有一座好大形o既風車, 好靚, 同埋好涼爽, 好舒服. 最衰冇帶食物, 如果唔係去果度野餐都唔錯~~ o係果度逗留左都好耐下, 又影下相. 之後就起程步行去另一邊 --索古灣. 我地最初諗住好快行到, 點知行下行下, 個天就越o黎越黑, 但又未行到喎, 附近週圍又靜, 所以步速就越行越快. 二來我地仲擔心緊, 索古灣果邊會唔會冇船答番出去架, 如果冇, 咁咪要行番轉頭去榕樹灣, 但係個天又好黑喇喎, 諗起都幾搞笑. 好彩最後我地一去到索古灣就即刻見倒有架船, 仲係就快開船tim, 真好彩~~ 之後出到去食埋晚餐, 再加個石磨坊甜品. 諗起個甜品就真係飽.. 果晚食到飽到頂...

聽日講, 南丫島出名食海鮮, 下次一定要試下先得~~

 
人蔘烏龍茶聚

12月29日去旺角上樓, 自從我阿哥帶左我去呢間茶樓度食野之後, 我就不斷將呢間o既名茶加美食介紹比我d同事朋友. 計埋今次, 我就已經帶左三班人去呢度食野喇. 呢度d 人蔘烏龍茶真係一流. 飲過一次之後, 就鍾意左呢隻茶. 暫時來講, 呢三班人都對呢間野有讚冇嘆的 (或者佢地冇同我講嘆o既野喇, 哈哈). 睇倒呢段日記o既朋友而又識我o既, 而又想試下呢間茶樓, 就即本叫我帶你地去喇. 下午茶仲好抵tim呀~~

 
趕遊海防博物館 

 同一日, 飲完茶之後, 就同阿CMAN, 阿PUI, 阿LWS 三位靚女一齊去海防博物館. 但係因為時間關係, 我地得好少時間, 好似得兩個鐘頭. 所以我地都好似走馬燈咁去睇, 冇乜詳細去睇每一樣野, 同埋有d地方直頭冇去行tim. 我諗有機會要再去多次吧~~ 去完博物館, 行出去, 就比我地無意中, 參觀左間船廠. 果度環境幾特別, 冇諗過可以有機會入去行下. 因為呢間船廠係專門幫人修理船仔的, suppose 係唔會比閒人就咁行入去睇. 都算叫做大開眼界喇~~

 
哈勁達s火鍋

到左同一日夜晚, 我地終於去食倒哈勁達s o既火鍋雪糕喇, 真係好開心. 我足足等左成年呀. 之前叫極都冇人陪我食. 當粒雪糕點完d 朱古力醬, 等一陣, 再放入口, 果種感覺真係好正~~ yummy yummy~~ 但好可惜o既係, 本身想試埋火焰雪糕, 但銅鑼灣呢間分店, 竟然冇貨, 冇得食~~ 唯有等下次有機會再試喇.

總括來講, 今日一整日行程好開心, 好充實~~

 
昂坪360 & 齋菜

12月30日, 我泰國親戚來香港探我地. 真開心, 佢地每年過o黎香港都會帶好多好野食過o黎, 同埋會造好香o既泰國菜比我地食. 之但係, 去食泰國菜之前, 我地成家人就帶左佢地週圍去. 12月31日號, 我地去左大嶼山. 因為今年香港多左個昂坪360. 而咁o岩佢地每年來港都一定會去大嶼山大佛度拜一拜. 好彩我阿哥一早已經頂左飛, 如果唔係就要排好耐隊, 咁就掃慶了. 我地上到去, 影下相, 就行上大佛度. 仲參觀埋裏面料舍梨子. 但因為唔係可以近望, 只能夠遠觀, 所以都睇得唔係太清楚. 之後我地就去左食齋菜. 大劍d齋菜都幾好味, 好好食. 之但係又唔算平, hk$100一位. 不過都冇所為喇, 當添香油吧.

 
元旦倒數 

今年元旦, 我又係同班仔仔女女一齊過. 首先我就o係自己屋企食完舅父所整o既泰國餐, 因為今年時間有限, 所以就冇往年整得咁豐富lu. 今年只有沙爹, 同埋辣椒炒碎肉. 好正呀 !! yummy yummy. 食完之後我就出街搵佢地喇, 今次選擇左o係Bobby屋企打邊爐. 當打完邊爐, 執好晒野之後, 我地就行落葵芳倒數. 落到葵芳之後, 見倒一大班比較大年紀o既 "哥哥姐姐" o係條街度跳舞. 感覺倒自己同呢班人有少少格格不入, 哈哈~~ 不過冇所為, 都係想襯下熱鬧. 當12點過後, 倒數完我地就返返去bobby屋企玩UNO. 今次UNO有新玩法, 好正, 好好笑好好玩. "老屈五隻, 講粗口五隻, 誤導三隻" 等等.. 今年元旦都玩得幾開心, 幾熱鬧, 雖然第二朝先走, 個人好累, 但元旦呢d野一年一次. 唔緊要喇 :)

 
尖沙咀海旁攝影團

通宵過後, 第二朝返左屋企訓覺. 訓到下晝起身, 就要陪舅父出街. 今日行程係首先帶佢地參觀馬場. 今日天氣好好, 個天好靚. 好耐未見過咁靚o既籃天. 果陣真係即時想唱番首 "籃天與白雲", 哈哈~~ 我同佢地o係馬場睇左兩場馬. 今次係我第二次入馬場. 第一次係因為果陣o係沙田馬場度做電話投注, 早左放工就行過去睇下. 現場睇賽馬有另一種感覺, 會好熱鬧同刺水竹尸大激, 因為背後o既馬迷, 或者賭馬o既人會不停咁叫, 幾多號呀, 上呀, 頂住呀, 跟住最尾一句 "@$@$##@$%%^" 又輸....!!!

之後就出左去旺角食泉章車食晚飯. 當然又離唔開一定會食鹽局雞喇, 真係好好味, 梅菜扣肉喇, 撈飯勁正. 食完飯, 就同舅父佢地出左去尖沙咀影相, 幫佢地留低維港美景o既一個回憶. 影影下, 我得知我班攝影之友同樣都係o係尖沙咀, 所以我就join左佢地喇. 同佢地o係文化中心對出行人天橋上面玩左好耐, 影左好多相. 經過果晚就知道, 同一個景點, 可以玩好耐架, 就算係一條柱都可以玩超過半個鐘.. 哈哈~~

就係咁樣, 2006年就咁就過左喇~~ 當然仲有好多野不能盡錄. 2006年尾過得真開心, 真充實~~ (p.s. 呢篇日記真係拖左好耐, 今日終於打完喇, 哈哈!!)