Journals
Thursday,Feb 15 2007, 10:25:47 AM我和師姐有個約會
今年情人節好開心又緊張呢, 因為我為呢個情人節準備左話多唔多, 話少唔少o既野. 基本上, 尋日返工, 全日o係公司都冇乜心機做野, 只係諗住夜晚個planning, 夠唔夠特別, 因為今年係我同師姐第一個情人節, 我想過得特別d, 難忘d. o係公司等左好耐, 終於到我預定離開公司o既時間 (5:00pm).
我覺得有某d情節令我覺得好刺激, 好緊張, 所以等我o係度打低佢先... 哈哈~~
原本個planning係, 我提早一個鐘頭放工, 去旺角拎花, 再去香港站補師姐, 哈哈, 但我係約佢在荃灣等的. 之但係我打電話去花店, 負責人同我講花未準備好, 要遲一小時. 我當時即心諗.... 第一步就衰左, 點好呢??!! 我唯有同師姐講, 公司有野做, 要遲d先走, 目的係想師姐唔好咁早離開公司, 盡量拖延佢時間. 轉過頭, 我等到六點就放工奔去地鐵站, 答去旺角拎花. 果陣係六點半. 跟住我就打電話同師姐講, 我放工喇, 同佢講, 可以執野走人, 叫佢落到地鐵站打電話比我.. 哈哈~~
跟住我就由旺角答地鐵去中環. 真係唔知點解, 平時答地鐵呢d站, 都唔會覺得答好耐, 但係尋日每一個站都覺得好長時間, 架車要行好耐先到站, 時間一分鐘一分鐘咁講, 我就越緊張, 因為我怕師姐o係我到香港站之前, 佢已經答左東涌線走左, 到時真係豬囉. 我本應想去到中環站先打電話比佢, 但又怕佢中途打電話比我, 咁我到時咪穿煲. 又或者佢見咁耐我都冇打電話比佢, 佢自己走出去行陣先都唔掂. 諗諗下, 我都幾狡滑, 哈哈.. 當我去到金鐘o既時候, 佢打電話比我, 但我唔聽得.. 一聽就中招. 當我一到中環站就即刻o係靜少少o既地方打電話比佢, 問佢去到邊. 點知佢話, 已經落緊去香港站喇, oh my god, 佢真係快過我.... 咁我就一路行得好急, 一路講... 叫佢去7-11 幫我搵本書, 我話本書好得意, 但唔記得書名, 於是我就話, 要問一問同事先, 叫佢等我一陣, 我轉頭再打電話比佢. 哈哈. 好明顯, 我一收線, 當然唔係打電話比同事, 而係由中環站跑去香港站喇. 當我跑到果陣, 佢就打o黎, 問我得未, 我就話, 其實週圍都有7-11, 我自己睇都得 (佢諗住我會去緊荃灣). 跟住就收線, 佢入閘, 我就跟住佢後面.. 哈哈~~ 結果就係, 我好突然咁出現, o係佢後面, 仲比埋個surprise佢喇.. 哈哈. 真好彩, 最終都成功. 好開心~~
但唔好開心得太早, 我今日最豬o既一件事係, 帶左部普通DC 仔, 帶埋叉電, 火牛返公司叉, 但竟然冇帶memory card, 哈哈.. 所有野都好好, 係衰o係部相機度, 真係豬到爆... 哈哈~~ 不過好彩後尾都有辨法將我地開心o既時刻影底. (我後面會講的).
我同師姐都有個共識, 就係食野方面唔需要太過特別, 只要簡簡單單就可以了, 只想唔需要同人地迫, 食完搵地方週圍行就仲好. 所以我地兩口子最後就揀左去食炒公仔麵, 加兩杯餐茶. HK$40.非常之抵食. 然後就向黃金海岸出發.. GO GO GO~~~
入到黃金海岸, 我地就開始慢步了, 沿途見倒有唔少攤擋, 亦有好幾個畫家幫情侶畫畫. 但都冇乜特別, 咁我地就經過酒店, 行落沙灘. 原來呢d 日子行落沙灘個情境係幾特別. 會見倒一對對人, 每對一個小area, 有的就咁坐低, 有的會訓低, 有的會點著爉燭圍住自己. 當時我仲話, 唔小心燒著自己d 衫褲就真係搞笑囉, 哈哈~~~ 行下行下, 發覺, 夜晚望住個海都幾恐怖架, d浪好似想打埋o黎咁. 之後我地行左去一個好大o既海豚廣場, 果幾隻金屬海豚好大隻, 大得好恐怖, 唔係咁夠膽直望太耐, 哈哈~~
我地o係果個廣場度交換禮物, 我收倒一件溫暖牌o既頸巾. 我好鍾意架, 佢親手織架, 又高針又低針, 對於我來講太複雜了, 但好溫暖. 但Honey, 下次記住唔好織到咁夜喇~~~ 至於我送左乜野比佢, 我送左對好靚o既波鞋~~~ 期待佢下次著出o黎睇下. 之後我地就行番出去搵佢個朋友郭小姐, 用佢部相機幫我地影相. 影完出面, 就o係黃金海岸酒店裏面影, 希望當晚影d相好靚喇. 經過果晚之後, 我覺得一部輕便o既相機係需要的. 如果下下都帶部大機出去, 就會好麻煩~~
最後, 我地就答車出荃灣, 再轉車返屋企了~~ 雖然大家都行到很累, 但若果第二日係假期的話, 就非常之好了~~ :-)
當晚完全可以感受到情人節o既氣氛, 其實日日都可以係情人節o既~~~ 只係唔會日日有禮物, 哈哈~~