Journals
Monday,Dec 26 2005, 09:30:24 AM迪士尼之旅
二零零五年十二月三日
今日去左迪士尼呀~
公司一年一度的outing旅行今年揀左香港迪士尼, 我當然第一時間報名啦, 唔駛錢去之餘仲包埋兩餐仲要有$50回贈, 簡直係抵到無人信, 雖然好多人都不停咁彈香港的迪士尼點差點差, 呢日來到香港迪士尼我又唔覺得係咁差喎~ (不過可能我未去過其它國家的迪士尼啦)
朝早由於有function要做, 所以我地有幾個同事要做完function先可以入得去, 其它人已經在11點入左去, 而我地就下晝兩點先入到去, 先來一個快的午餐, 有d同事同埋屋企人去, 所以我就同兩三個單拖去的同事就開始不停咁玩, 不停咁行, 不停咁影相, 先去巴斯光年玩槍法, 雖然入到去都唔知射乜鬼, 但係突然覺得自己多左好多童真, 跟住去左睇獅子王, 呢個show一d都唔流, d人唱功又勁, 值得一提係當中最靚的並不是外國人, 而係一個中國女子, 佢扮仙子飛來飛去得到幾多掌聲, 為中國人增光不少! and then 我地去左睇3D影院, 非常之好睇呀~ d珠寶真係好似在面前咁, 我差d好似d小朋友咁伸手去摸, 哈, 跟住我好奸地在無俾人發覺下唔走睇多一次! 跟住fast pass夠時間, 我地去左玩space mountain, 其實一d都唔驚, 不過我都要嗌得好大聲, 勁興奮!!
壓軸好戲係八點鐘的煙花, 越睇越覺得好夢幻, d煙花靚過年初二維港果d, 我忍唔住不停咁"嘩", 配埋d音樂, 令我真係覺得呢度真係好夢幻呀~ 不過我同d同事事後的感覺都係....睇煙花時好感動, 可惜大家身旁果d係同事....(唯一失色之處) 哈哈
最終, 我地十點幾先捨得走, 由於朝早五點幾已經起身, 所以走果時好似行唔郁咁......