Journals
Tuesday,Oct 16 2007, 05:32:00 AMجيبك نضيف؟
كل سنة و احنا طيبين
وتعبانين و مهيسين
من الفقر برضه مدعوكين
متقولش لأ و ازاى وليه؟
هو أنت ناسى انت ايه؟
انت الغفير وانت الأجير
انت الموظف و العميل
اوعاك تقول انا بييه و بييه
دانتا يا حبيبى على البوفيه
و ف كل قاعدة و كل بيت
مستنى اللى يمد ايد
يطعم فيك و يسد جوع
واوعاك تجيب سيرة الحكومة
دى هى أبوك و أمك و أخونا
خليك يا سيدى على الرصيف
تعبان جعان أهو نام خفيف
بس المهم تعيش نضيف
جيبك نضيف؟؟وتقول يعيش,يحيا الرغيف
Tuesday,Oct 16 2007, 05:29:29 AMجوه الدواوين الوطنية
جوه الدواوين الوطنية
اكوام اكوام من الشغل و دى حاجة عادية
لكن الغلبان طهقان زهقان من الحر و من العيشة داهيا
روح يا عباس اشترى مروحة من عند الست ام بهية
يمكن بيها نفك الزنقة وتصبح ديا عيشة عادية
*****
فتاح يا كريم رزاق يا عليم وادى واحد جاى عايز خدمة
نعمين يا باشا..فيه حاجة يا بيه؟؟شطبنا خلاص فوت هنا بكرة
ولا انا راح أقولك تعاللنا بعد سنة يكون الواد عباس جاب التهوية
أهو راح و مجاش و متسألناش راح نعمل ايه فى الليلة ديا
****
هو انت يا بيه قاعد كده ليه لا تكون هنا للست عطية!!
اسكت مش راحت المستشفى..أصلها راح تعمل عملية
أيوة ياخويا والنبى دى ست غلبانة وبتجرى على عيال نبوية
نبوية دى ست جارتها جوزها مسكوه فى الجهادية
****
الا انت ياخويا مقولتليش هو انت جيت هنا عايز ايه
تكونش جاى علشان وظيفة ولا منصب ولا ايه؟
طاب يلا خد الباب فى ايدك احنا مش ناقصين يا بيه
....يا عم انا بس جيت أقولك ان تمن الشاى جنيه
:D