Journals
Saturday,Aug 27 2005, 02:54:49 AMPinkPink Missha 出事記~~
| 今晚同菲安做完占就一個人o係TST行左一陣 我一面得就一面等虎虎食晚飯 (託賴今晚的TST沒有下雨 而在下亦不是身處於意粉屋) 行到Missha就入左去睇睇 之前上newgroup同forum好多人都好buy呢隻野 咁就入去行下啦 本來都冇諗住買野 因為我d化妝品同護膚品都已經有好多喇 兩個箱都裝唔哂 點知..... 我一行到去eye shadow個櫃 我就停左o係度睇 我上次睇左本"媽架先"話今個秋冬將會流行深紫色既e/s 我一直都勁鍾意紫色e/s架 不過成日都搵唔到岩既紫色 而家我又見Missha有隻好有出色既purple colour 喎 yeah~~~~我仲想即買既時候..... "小姐，紫色既e/s唔係好岩你 如果你用紫色e/s 就會睇落個人好唔精神架喇" 一位sale姐姐好似好專業地說 "下? 咁我可以點" damn it!!! 我真係好想要隻靚紫色e/s呀 "我介紹第二隻俾你啦 你咁白 要d清淡既color會好d...拿~呢隻橙色丫 你查會好自然架 又可以當face color~~" 佢一面講就一面同我試..... 呵呵 又真係靚喎~~~咁我又好似發哂姣咁試埋其他color喇 之後仲買左隻鮮黃色tim 兩隻mix埋一齊查又真係幾得喎 ok~~~~~fast trade!!!! "小姐 你而家有兩樣野 如果再加多樣野就可以送個eye lip remover俾你, 你仲睇唔睇下?" 之後我又要埋個粉紅色eyeliner 到我俾錢既時候，個sale又話 其實你再買多樣野就可以再俾多個body lotion你架喇 "e~~~body lotion? 仲要係蕉味? woo~~~太吸引了 我真係好鍾意香蕉既味道~~"我再講"咁你仲有咩好介紹呀?" 就係咁 個sales就介紹左個nail essence俾我 我試左就真係好用喎 同埋冇香料同d化學味囉 shit~~~我個銀包就係咁俾我送左去"深切治療部"喇 到左冇耐 虎虎打俾我 話佢已經到左 佢一見我又買e/s已經好唔鍾意 因為我已經勁多e/s仲應承過佢唔再買 但係又break左promise~~ "你點睇就係得兩隻眼姐 點解仲要買e/s姐"虎虎扮哂好"不經意"咁同我講 "我都係想你有個靚靚女朋友姐 你估我行街買野唔辛苦咩 我都叫係出錢又出力丫~" 死撐係女人的強項 呵呵 "食咩呀 唔理你們!!" 就係咁我就拖住虎虎同埋我既戰利品去食我最鍾意食既壽司晚餐喇~~~ vivi vivi
|
Friday,Aug 19 2005, 04:35:29 PM與FION雞的免費晚餐
因為之前同人地design左個logo 又真係俾人選中左 就係咁樣 fion雞就請我同shirley食一個晚餐
雖然下著好大雨都冇損我地食免費晚餐的雅致 我地約左去TST既Circle Cafe等
去到果度 嘩 真係好靚呀 平時經過都唔覺d咩 只係覺得好民族feel囉
原來入面d decoration都係好靚好有心思呀 尤其係d 燈 盞盞都好有特色 真係好靚
一坐低 我同shirley就係咁叫野食 唔貴唔叫 哈哈 好開心
d野都ok啦 average囉 不過就咁睇佢既decoration都值返哂啦 佢地連餐具都好有心思架 我好鍾意呀
之後我地仲不停咁影相 係咁玩都唔理旁人點睇喇 果度真係太靚喇 點都要影多d相返屋企當手信先得
就係咁我地呢餐就由六點幾食到九點幾喇~~~
今晚真係好開心呢 多謝哂我既fion雞呀~~
Tuesday,Aug 16 2005, 12:28:02 PM姊妹們的聚會~~~
本應約左爸爸俾對鞋佢既 但係打左一次電話俾佢唔通 (我都預左) 咁我就算喇
同扒扒一齊坐車返上水 途中收到苑苑打黎話佢今日好準時收工叫我地一齊食飯gathering喎
我第一個反應就係" 佢突咁得閑叫我地食飯?係唔係同男朋友散左呀?"
扒扒就話"我都係咁諗呀" 勁好笑
就係咁 我同扒扒就各自返屋企先 我就沖個涼仔 扒扒就要扮乖女同佢屋企人食下飯(我已經叫佢扮下野 食幾啖就算)
冇幾耐 苑苑既追魂call就到喇 我叫佢上來我度先 因為我仲未得住
一上來 苑苑就賣哂口乖同我爸爸媽媽豪豪打招呼
我亞媽同亞爸起勢咁讀苑苑瘦左又靚左
仲攪到苑苑鬼死咁開心 仲有d唔捨得走
我已經著哂鞋係咁叫佢 佢先走
去到lift口 我地就絛無啦有個念頭"不如直踩上扒扒屋企啦" yeah~~~目標一致
盲係咁我同苑苑就行左兩層樓梯上去扒扒度
拘捕左扒扒之後 我地終於去左"紅樹林"度食飯喇
係個gathering中 扒扒講左好多佢婚禮既野 過程都好溫馨好好笑
最令人妒忌既就係佢可以去北海道洞蜜月
此外 我地仲發現左我地成班朋友之中 個個唔係有家姐就係有細妹
所以我地朋友第日結婚都可以搵自己既姐妹做伴娘
而唯獨我就只係有細佬 根本就冇姐妹可以做我伴娘..........
哈哈 我突然好吃香 因為我可以接受佢地既申請做我伴娘喇 (如果我有幸嫁得出的話.............)
Sunday,Aug 14 2005, 10:34:51 AM娉娉配con歷險記~~~
由於之前"扭爆"左幅con 我今日又要去配過喇
之前果幅帶得唔係咁舒服 我都係換過第間同我配啦
拎埋我而家幅con 我就衝左去上水廣場喇
好奇怪囉 原來星期日上廣場既office tower係要登記id 既 我都唔知點解 我亦都未見過原來上水都可以咁旺咁多人
好啦 搵到間似似地樣既眼鏡鋪就盲中中咁入左去 點知...........
"小姐，你帶開隻con我地公司冇入貨好耐架喇 你可以試下大chain 例如88啦 藝視啦 睇下有冇" 個驗光對我講 佢既態度真係好鬼誠懇。
"咁我覺得呢隻帶得有d唔係好舒服 雖然呢隻con我已經帶左七年)我想換下 你冇呢隻con冇問題 有冇其他介紹丫" 我都問得好鬼誠懇。
"小姐 你而家帶呢con既生產線已經去左taiwan造喇 佢以前都係germany造 咁地方唔同生產質素都唔同 你帶得唔舒服係好正常。"個驗光師又再好誠懇咁同我講。
"咁我而家帶呢隻已經唔舒服 你又話我帶開就要keep住用果隻brand 咁我即係唔使配con啦" 喇 各位觀眾 我冇發皮四呀 我都應得佢好誠懇架 不過開始有少少覺得佢吹水姐
"唔好咁講 唔好咁講 你當我side你時間啦 累你要上來一趟。"
"唔緊要。" 我心諗 :你而家肯同我配 我都唔濟呀!!!
之後，有個男人衝左入來.....
"我想退錢。" 一個外表斯文中有點瘦弱的書生形男士好大聲咁同個驗光師講。
"先生請到一邊坐。"
我見佢地兩個走埋一邊傾
個文弱書生係咁爆粗要退錢 而個驗光師就係咁話"誤會姐~~誤會姐~~"
我最後(不到十分鐘)都係見個男人可以悻悻然咁拎返700個大洋走。
我果陣突然覺得自己好幸運
幸運就在於我o係呢度配唔到con，可逃離要上來爆粗叫人退錢的厄運。
謝謝~~~~
Sunday,Aug 14 2005, 02:24:17 AM仲未有電話既~~~
等左幾日都係冇電話來，我想我都係冇機會架喇。
不過算啦!! 扒扒可以放心我到時有可以做佢既姊妹喇 哈哈 (佢之前怕我得左 到時唔得閑做佢姊妹 )
呢段期間我發覺原來自己都可以充得下架 我扮起大方斯文都呃得下人 勁好笑
今日係我既可愛婆婆的生日，我專登買左一盒位x堂既赤靈芝片送俾佢架。
不過返到屋企就俾我亞爸亞媽話我蠢。話切左片既靈芝已經冇用，要買就要買原隻野生靈芝。 (佢地真識食)
咁我都未試過買呢d野 我黠知呢 之後佢地仲係咁問買左幾錢 驚我俾人呃咁 好好笑
佢地問到我好煩 我就話"我執返來的 就好似廿年前你地執我返來一樣~~" (再加一個淩厲既眼神 佢地就俾我收伏左同收聲喇)
總之，我會繼續努力積極尋找工作架喇 要轉行我都肯架喇而家~~~~~~