Journals
Thursday,Jul 10 2008, 07:06:51 AM10Jul
今日返工呢個旅程真係有夠 ... 都唔知點形容 ... 總之就搞野啦! 首先係上左"校巴"之後就開始拎部機出黎睇MV。第一個睇既係土屋 featuring AI "Crazy World"既Live，ok丫，之後就睇返之前dl左但未睇既，先睇左上原多香子果首唔知甚麼歌 ... 嘩，心諗佢真係唔係好掂! 講樣咩，唔係靚，又冇型格，把聲咩，經過咁多年仍然係唔係好掂 ... 跳舞咩，咪玩啦! 真係戥企係佢後面伴舞既dancer慘，要跳埋d咁無聊既舞! 其實真係唔知佢既目標觀眾係邊一批人 ... 我諗只能夠講，日本既market真係好大，因為佢d咁唔特別既artist都仲可以出到碟同埋仲有人買佢d碟! 你話日本人可以容納音樂既程度有幾高？
好勒，好辛苦咁捱完個MV，就睇左香港果個甚麼Chelsea既唔知甚麼歌 ... 救命，講真，我覺得佢個樣都算sweet，拍戲係冇問題，佢把聲亦未算難聽，不過佢既唱腔唔知點解好似怪怪地既？好有80年代feel囉我想講，同埋首歌真係悶到爆囉! 作為新人竟然俾隻咁悶既歌佢唱，玩野咩？!
之後就睇左Five O'Clock Heroes feat Agyness Deyn既"Who"。 Agyness又真係幾型，以女仔黎講佢既短髮真係好鬼正! 不愧為名模呀下! 好勒，之後，亦即係最後睇既係黑木美沙既"Like This" ... 係! 冇錯! 係黑木美沙! 之前我完全係唔知佢都有唱歌既，直至睇到呢個MV! But u know what, She's just so cool! 雖然佢原本都只係model，同拍過下戲/劇，但佢無論係唱，或者跳，都非常ok，隻歌都好ok，睇完個MV你只會覺得好正! 再加上如果之前你有睇過"一磅的福音"既話我相信大家應該會更加意外!!
當睇埋呢個MV之後，架"校巴"就已經到左公司勒 ... 好一個完美既結束! : )
Thursday,Jul 10 2008, 07:04:21 AM加油!
當大家係度熱烈咁睇緊或者談論緊"Last Friend"既時候(雖然我都睇左兩集)，我就仲係度追緊都唔知算唔算係上季阿玉木宏同綾瀬遙做既"鹿男あをによし"。呢套野開頭唔算好睇，不過因為實在冇野睇先叫做睇下，點知睇睇下有開始覺得幾好睇! 我覺得玉木宏係入面實在太瘦喇，所以就唔多靚仔(不過我阿妹竟然仍然話佢靚仔喎! 奇!)! 而綾瀨就一貫既咁得意! 驚喜既係做堀田倔既多部未華子，佢係劍道比賽一個人連打四場最後仲贏埋果場戲就當然感動啦(當然佢終於有笑容呢下都係原因之一)，而之後有一幕話佢又遲到返學，返到課室之後俾阿玉木宏問左一句之後就喊左出黎果度都令人有好深印象! 而家我應該淨返一集，要加油喇!! >.<
Wednesday,Jun 18 2008, 03:17:18 AM16Jun (激動 - 下)
返到屋企食完飯，幫阿媽洗完碗，就同阿妹去睇"the Happening"(破.天慌)。 我覺得都幾好睇喎，佢d氣氛營造得幾好，個message又好(愚昧的人類呀!)，又有Mark Wahlberg(本人係幾buy佢d戲既! 不過佢既rap就真係咪搞勒! lol)! 最好係，今次阿M. Night Shyamalan並冇為twist而twist! 你話如果好似Village咁就真係幾可笑(雖然之前成大半都唔錯)! 呢套戲要講有咩唔掂既，就係個女主角 ... 我意思係，無論佢個樣同演技都 ... 唉 ... 就連出場冇幾耐就死既John Leguizamo都好過佢(話時話，諗番我第一次睇佢係Michelle Pfeiffer既Dangerous Minds! Wow，真係幾多年前呀 ...)!
Wednesday,Jun 18 2008, 03:00:22 AM16Jun (激動 - 上)
今日返早。 放工之後落左信和 ... 實在太激動勒!! 係一手市場(即係新碟方面)除左AAA新出既single我係咪都會買之外，其他都冇乜特別 ... well，雖然都想買平野綾(不過都唔係新啦)，不過因為冇行貨，所以略嫌比較貴唔捨得買 ... 但係係二手市場就超激動!! 先有我係東京都搵唔到既AKB48既single"桜の花びらたち2008"(初回既cd+dvd版喎!)只係68蚊! 問題係，呢隻碟就算係Amazon既中古都要￥2,618啦(即係大約港紙191蚊)! 好，呢樣都未算超激動 ... 原本要幫表姐夫買既奪寶奇兵dvd既boxset(一連3集加隻feature既dvd)，原yen價要￥9800(715蚊港紙)，開頭都已經賣緊38蚊(係! 係港紙!)，但係而家因為係次貨(個boxset盒出面爛左少少)，而家賣25蚊!!! What da .... ??? 好，呢樣都仲未算超激動(因為都唔關我事)，最最最超激動既係 ... 我呢排一路留意緊既日本樂隊，High and Mighty Color(唔好意思，係就係遲左d)，佢新果隻(算係新啦!)cd+dvd，係一手市場賣緊300，而家二手賣98喎! 二手又so what？佢地因為冇行貨到既關係(台版都冇喎)，所以原本真係要買既話就要捱水貨貴碟(好似以前買Zard咁)，但係而家只係98咋喎!! 唔係唔激動呀？!!
好，原本諗住咁就算啦! 咁上埋樓上買左AAA就諗住走啦! 點知經過另一間二手舖既時候，諗住入去再睇一睇就走! 點知 ... 竟然俾我見到Train係93年出既果隻碟既日本版(同埋睇黎似一手，因為包裝同d貼紙都仲係度)，竟然只係25蚊!!! 情形就同之前Fray係香港未有港版時我幫阿妹買既日本版只需要18蚊時完全一樣!!!(日本版喎! C'mon!!) Ok，我知道雖然Train並唔係甚麼偉大既樂隊，同埋除左呢隻碟既"CAlling All Angels"之外我都冇聽過其他佢地既歌，甚至乎都唔覺佢地有再出過碟，不過，呢隻"CAlling All Angels"又真係好聽喎! 同埋其實就算pop野，要做得好都唔係一件易事啦(睇下而家有幾個香港歌手你會肯俾錢買佢地d碟就知!)，rite？
Ok ok，係返屋企既時候，出左地鐵係上緊自動電梯既時候 ...... 竟然 ... 竟然俾我見到原來Panic at the Disco會黎香港開concert!!!!!!! Wow! U've gotta be kidding me!! 真係從未諗過! 真係好想睇! 不過 ... 要6百幾蚊喎 ... 雖然已經俾之前其他樂隊既concert飛平 ... 不過6百幾喎 ... anyway，無論點都好，總之就係激動啦!!!
Thursday,May 8 2008, 07:13:09 PM0306 - 09May
Just back from the midnight show of "Speed Racer"! Gee, it's just so cool!!!
