Journals
Sunday,Jan 30 2005, 12:30:24 PMJournal #8
今日去o左吉島行,收穫係一條短褲~行完落o左美食廣場間M記飲可樂~隔離檯有一家人,o個個小朋友食開心樂園餐,咁就有一個盒(拎走o個個好似間屋仔o個個呢~),咁就擺o左過o黎我o地張檯,我見到盒上面個麥當勞叔叔好恐怖,叫大寶睇,我o地大笑,然後o個個小朋友,驚死我o地「才羅」佢咁,用手移番個盒埋自己度(低B~)...之後大寶話個細路係咁藐佢,激死佢(仲低B~為o左個細路勞氣 ~),之後佢阿媽擺埋兒童餐個公仔過o黎,個細路n咁耐之後發現o左仲怪叫一聲,問佢阿媽做咩擺個公仔過o黎,我即刻走,費事佢又以為我會「才羅」佢D o野,正低B仔,我要唔識買咩~
夜晚番到屋企,睇電視見到一D好殘忍o既o野!條友將隻活生生o既蟹放落D好淺o既油度炸...我感覺到隻蟹好痛苦...佢D腳不斷o係度郁下郁下......地獄與天堂,有時只係一線之差......
Saturday,Jan 29 2005, 10:49:04 AMJournal #7
我而家o係個lab report上面努力緊...計o左成個表o既數...計o左成個鐘......o抖o左陣,阿媽'lao'我落街,當然應承o左佢,如果唔係我真係覺得個腦會爆~去到惠康,阿媽點都要買夠$300,咁因為佢一心係買酒,支酒都已經$248,所以只係需要買多少少o野~o係酒架,冇阿媽想買o既酒,然後問阿姐,阿姐話有,o係畀錢o個度同佢講就得,咁我o地就好安心買其他o野,而我就肩負起計數o既責任 ~為o左最後o個4個幾,阿媽諗爆腦都唔知買咩好,結果佢執o左罐罐頭話走,佢仲怨我話我好唔買汽水...但係佢一直都冇話買,佢話佢一早已經叫我去拎, 但係根本就冇!好無奈!!然後去畀錢啦,咁就叫個收銀員「才羅」酒,咁唔知有冇嘛,因為o係有酒o個個櫃檯都冇擺出o黎,我就見到阿媽有D失望o既樣,原因唔係因為佢一心落o黎買酒買唔到,係因為如果唔夠$300就冇雙倍印花,而當時只係得$53!!咁好彩最後都有~o係我o地後面o個個女人因為冇佢想買 o個支酒,將揀好o既貨放低晒走o左~
其實我好想知道我o地班究竟有幾多人係上星期五個MA tutor?點解上次可以得番8個人番?搞到阿Sir好冇癮...即刻頹晒,講o野細聲o左100倍...又冇人肯出去做數(咁當然o既,大家都唔識做...識做都唔駛上tutor啦...)...落堂o既時候,佢用好失落o既聲音叫我o地畀建議佢改善下...唔好搞到得8個人番......好冇陰公囉...我覺得......
Friday,Jan 28 2005, 12:24:52 PMJournal #6
晚晚都唔夠「目訓」...唔知搞乜...「目訓」多D反而冇咁精神...隻眼仲腫......今日仲「支力」到爆o左句「真係希望今日係星期五!」...一講完就發覺有D唔妥,大寶已經話「唔駛希望o丫!今日已經係星期五!」癲o左!
回顧番尋日先...好耐之前(仲好凍o個排)叫過阿媽煲可樂煲薑,佢叫我去買可樂,點知一直都冇買~咁o岩尋日醒起,又因為要買雜誌o既關係,所以番到屋企o個邊就去買啦...咁費事整「巢」D雜誌(有Juno嘛!!!),所以去買o左可樂先~原本諗住去格價,不過去到惠康見到支兩公升(仲加送250毫升!!)只係賣$9.9我就好似發o左茅咁,即刻買!!!不過個樽頸位好難拎,不斷向下跣,咁就快快去畀錢走啦...諗住抽個袋會好D啦,點知佢畀個袋實在太細,我仲覺得有D薄,硬係凝住佢會爛,結果要抱住支可樂去買雜誌,買完雜誌就番屋企,諗住同阿媽講話支可樂抵啦,衝到番屋企門口我仲希望大門冇鎖,因為D o野實在重,可以即刻開門入屋,但係!我發現連鐵閘都鎖埋!!!o個一刻我先記得阿媽同阿爸出街食飯...仲等我滿心歡喜諗住阿媽會讚我......點知今日同佢講番,佢話之前試過賣到$7.5
!!!唉~
尋日買o左本《Milk》,入面有講到evian每一年都會出唔同款o既水樽,我真係一直都唔知...雜誌影到有幾年都幾靚~不過都唔夠今年呢個特別!雪山形ga!!!雖然我認為佢個樽蓋如果係淺藍色會更好~但係我都好想擁有呢支咁特別o既水(仲有好可惜我覺得evian D水好難飲!!)~
星期三o個日o係又一城amc睇《Saw》,覺得間戲院唔係好得......D爆谷好難食......咁都算...睇完戲...唔知點解...佢係完全冇指示你點離場......散場佢係唔畀你用番扶手電梯落去 (真係僵化...入場先得o個8個人都唔知有冇...咁少人散場阻鬼到你咩......),咁工作人員就叫我o地用玻璃門離開,好可惜我根本見唔到有任何玻璃門...結果就行o左去D走火通道...但係係搵唔到出口ga!!結果膽粗粗停o係一層度搭「車立」,點知頭頂有個揚聲器,正o係度播緊D恐怖片音樂...o岩o岩睇完套都有少少恐怖片,又搵唔到路走...仲要聽埋D咁o既聲...如無意外,我諗我下次都唔會再幫襯呢間戲院睇恐怖片...佢著實畀o左一個不愉快回憶我!!
今日走o左去影印中心進行諗o左要做好耐o既釘裝行動...釘o既係上個sem o既notes~好好玩 ~!仲發現影印中心個嬸嬸真係好似傳說中咁咁好人!上個sem去「才羅」報紙,餐餐我都覺得佢好鬼惡!不過今日釘裝,點知研究o左好耐都搵唔到用邊一個掣可以令到條膠棒擘大口,然後我走o左去另一部機,中心阿嬸即刻走埋o黎問我做咩(可能其實只係驚我搞爛o野~),咁我就話畀佢知我唔識用,咁佢就好好人咁教我~o係我釘裝6本notes o既期間,我發現做呢個中心阿嬸都要識好多技術~釘裝,fax,影印,甚至仲有過膠,仲要睇埋檔報紙,可能仲要睇埋D自動販賣機...哇!!!我自問連呢個阿嬸都不如!
努力加油!!!
Tuesday,Jan 25 2005, 02:21:03 PMJournal #5
原本覺得《雌雄同體》好難聽的...不過聽聽下又覺得幾好~不過其實係原本覺得全隻碟(《OTHERSIDE》)都唔好聽,不過聽聽下就覺得接受到~哈...不過都係有D驚聽《第二人》
,第一次聽仲以為隻碟壞o左......
雌雄同體 麥浚龍 lyricist周耀輝
換了你皮膚 換了你唇舌
換了你全身的感覺 即刻識穿我希望
換了你是我 亦發覺連心思都有女或男
我跟你相差多不多
＊我的香煙 借給你抽兩天
然後期望你心裡就有我的事
或者會變性 當我接近你一點
你的新衣 借給我穿兩天
難道要換性別 至得到你體驗
寧願接近到 當你詫異 伸我舌尖
換了我瞳孔 換了我頭髮
換了我無色的香氣 即刻棲身你天地
換了我是你 亦發覺連瘋癲都有女或男
我們卻偏偏想一起
你的高爭 借給我踩兩天
然後期望我心裡就有你的事
或者會變性 當你接近我一點
我的鬚根 借給你穿兩天
難道要換性別 至參透你思念
寧願接近到 不靠說話也知
我的香煙 借給你抽兩天
然後期望你心裡就有我的事
或者會變性 當我接近你一點
你的新衣 借給我穿兩天
難道要換性別 至得到你體驗
寧願接近到 當你快樂 我會癲
也許只有迷戀會叫我改變
我要變做你 將命運亦重疊
Repeat＊
唔打,繼續聽~~
Tuesday,Jan 25 2005, 09:37:08 AMJournal #4
越o黎越鍾意行過南山~因為行去o個邊會見到好多貓~D貓好搞笑,感覺到佢o地好懶好悠閒~超得意~最鍾意見到佢o地洗面~哈哈~摸摸~~~~~
唉~早幾日發現個PETER RABBIT電話座,左邊數起第三隻兔,佢隻右腳斷o左!!!跟住搵o左好耐都搵唔到佢隻腳o既殘骸,幫唔到佢進行接駁手術...隔o左幾日,隻腳突然出現番,咁我又趕住出街,惟有匆匆忙忙咁用白膠漿黐番佢...結果去完街番到屋企見到佢隻腳移o左位!!!真係唔係好開心囉~都唔知邊個咁殘忍整斷人o地隻腳......仲搞到我要做勞作......