Monday,Oct 8 2007, 05:56:54 PMأنا مصري بس حبيت أوي شعر بدو

• 

  Đĩě ƒΐŗš...

  (7 photos)

في مسلسل بيجي علي قناة MBC إسمه (نمر بن عدوان) علي الساعة 11 في رمضان يعتبر هو دة المسلسل الوحيد إللي بلحقه علشان انا أساسا مش فاضي , ولكن المسلسل شدني علشان لقيت راشد الماجد و كنت أول مرة أسمعله

لقيته كأنه بيتكلم من قلبه أوي بحرق , قولت مش مهم أسمع التتر لحد أخره _و كنت ناوي أساسا وعامل حسابي علي الملك فاروق _ طبعا انا يعتبر فاهم شوية بدوي فلقيت كلامه حلو , و بعد كدة من بعديها مبقيتش افوت حلقة بس الحلقة 14 مش طايل اتفرج علي حاجة علشان من بعديها و انا مشغول . فقولت أقولكم بعد بحثي الشاق علي ترجمه بعد الكلام إللي بصراحة مقدرتش أترجمها :

(البارحة يوم الخلايق نياما

بيحت من كثر البكا كل مكنون

قمت أتوجد وأنثر الماء علي ما

من موق عيني , دمعها كان مخزون

و لي ونتين من سمعها ما يناما

كني صويب بين الأضلاع مطعون

في ساعتين قل الرجا و المحاما

في وقتها كل المخاليق يقفون)

طبعا كل واحد فيكم فاتح بقه  و منزل ضب إسنانه تحت مترين و مش فاهمين حاجة , انا كنت زيكم بس الحمد لله بعد بحث شديد في المواقع إللي مكنتش قادر أبحث فيها لقيت الترجمة و هي كالتالي

بيحت : تعبت من فعل شئ

مكنون :محفوظ

أتوجد :يعني مش عارف بصراحة بس هي ضروري معناها بيظبط نفسه في الخلا علشان مافيش حمامات في البدو

و طبعا (منه له) هههههههه

ونة أو ونتين : معناها أنين ألم

صويب : دي بتتقال لما واحد بيتصاب بطلقة نار أو سيف

المحاما : علي ما أعتقد  إللي هي معالجة المريض (اصله قالها علي مراته لما ماتت , و علشان كدة إتسمي شاعر الحب و الوفاء )

و طبعا معناها كاملا أهو

إمبارح كان كل الناس نايمة

و انا كنت تعبان من كتر البكا

قومت أظبط نفسي و أرش شوية مية علي عينية

و إللي كان في دمع وراح من كتر البكا

و لية صرخيتن الم  إللي يسمعهم ما ينام

الصرخة الأولي كأني مضروب بالنار مابين أضلاعي

و الصرخة التانية لما كان في أقل من ساعتين و مع عدم وجود علاج  و طبيب

راحت حبيبتي و الناس كلها كانت واقفة و محدش عرف يعمل حاجة

و طبعا دي كانت ترجمتي و الله أعلم هي صح و لا لأ

و أرجو من إخوانا العرب يساعدونا علشان إحنا فاهمين شوية و شوية

و هما لو طلبوا حاجة نظبطهم بردة

هههههه

و شكراً